GI-2155 - Grupo de Referencia Competitiva - Xunta de Galicia
O grupo GI-2155 está formado por profesores e investigadores de Química e Bioquímica e Bioloxía Molecular pertencentes a distintos Departamentos e todos eles IPs no CIQUS, un dos centros de investigación de excelencia da USC. Trátase dun grupo multidisciplinar integrado por catro IPs do CIQUS: José Manuel Martínez Costas, Eugenio Vázquez, Miguel Vázquez López, e Concepción González Bello.
O grupo de investigación traballa no ámbito da biomedicina, da química biolóxica e a biotecnoloxía, abordando diversos aspectos relacionados con un dos principais obxetivos do Horizonte 2020, “os retos da saúde e do benestar”. As liñas de investigación van dende:
- o desenvolvemento de novas terapias para o tratamento das enfermidades nosocomiais causadas por bacterias patóxenas multi- e extremadamente-resistentes aos antibióticos, en particular as causadas por as bacterias Gram-negativas de máxima incidencia no ámbito hospitalario (Pseudomonas aeruginosa, Acinetobacter baumannii e Enterobacteriaceae), fronte as que as terapias existentes cada vez son menos eficientes;
- o desenvolvemento de metodoloxías biotecnolóxicas novedosas (IT-Tagging) para a elaboración “á carta” de vacunas subunitarias eficientes para a prevención da infección por SARS-CoV2 ou o cancro;
- o desenvolvemento de terapias antiviriais innovadoras fronte ao SARS-CoV2 mediante derivados de productos naturais ou o reposicionamento de fármacos xa aprobados;
- o estudo do mecanismo de evasión inmune do novo coronavirus SARS-CoV2 como base da creación de vacunas innovadoras e alternativas as desarrolladas a nivel mundial;
- a creación de sondas moleculares de diagnóstico clínico para ser utilizadas en bioloxía celular e biomedicina;
- o desenvolvemento de novos dispositivos moleculares baseados en péptidos.
O grupo combina estudos e descubrimentos básicos de alto impacto no ámbito da química, biomedicina e da biotecnoloxía, con aplicacións nos campos da bioloxía, diagnóstico e da medicina.